Ahavuye isanamu, Getty Images
Ikarita yagaragajwe muri tombola y'uko amakipe azahura mu guhatanira itike yo gukina imikino ya nyuma y'igikombe cy'isi cy'umupira w'amaguru cyo mu mwaka wa 2026, yanenzwe na Ukraine ivuga ko ari "ikosa ritemewe", nyuma yuko igaragaye itarimo umwigimbakirwa wa Crimea nk'igice cy'icyo gihugu.
Icyo gishushanyo – kigaragaza ibihugu bidashobora gushyirwa mu itsinda rimwe ngo bikinane kubera impamvu za politike – cyagaragaje Ukraine ariko nticyari kirimo uwo mwigimbakirwa ufatwa ku rwego mpuzamahanga nk'igice cya Ukraine.
Crimea yigaruriwe n'Uburusiya kuva mu mwaka wa 2014 ndetse ibihugu bicye ni byo byemera ko uwo mwigimbakirwa ari ubutaka bw'Uburusiya.
Umuvugizi wa minisiteri y'ububanyi n'amahanga ya Ukraine, Heorhii Tykhyi, yavuze ko Ukraine yiteze gusabwa "imbabazi mu ruhame".
Impuzamashyirahamwe y'umupira w'amaguru ku isi (FIFA) yavuze ko "izi ikibazo" ndetse ko iyo foto yakuweho.
Mu butumwa yatangaje ku rubuga nkoranyambaga X, Tykhyi yavuze ko ibyo FIFA yakoze atari "ukunyuranya n'amategeko mpuzamahanga" gusa, ko ndetse "yashyigikiye icengezamatwara ry'Uburusiya, ibyaha byo mu ntambara, n'icyaha cy'ubushotoranyi kuri Ukraine".
Ku butumwa bwe yongeyeho uburyo "bukosoye" bw'iyo karita, agaragaza Crimea nka kimwe mu bice by'ubutaka bwa Ukraine.
Ikiganiro cy’abagore kuri BBC Gahuzamiryango
Inkurikirane
End of podcast promotion
Mu bihugu bidashobora gukina harimo nka Ukraine na Belarus, Espagne na Gibraltar, na Kosovo ikina na kimwe hagati ya Bosnie-Herzégovine cyangwa Serbia.
Ishyirahamwe ry'umupira w'amaguru muri Ukraine ryanoherereje ibaruwa umunyamabanga mukuru wa FIFA Mattias Grafström n'umunyamabanga mukuru w'impuzamashyirahamwe y'umupira w'amaguru i Burayi (UEFA), Theodore Theodoridis, kuri icyo kibazo.
Iyo baruwa igira iti: "Tubiyambaje kugira ngo tubamenyeshe guhanyagika gukomeye kwacu kujyanye n'ikarita yerekana amakuru [yagaragajwe] ku itariki ya 13 Ukuboza [12], mu 2024."
"Dushingiye ku byemezo by'ubutegetsi byinshi n'imyanzuro myinshi yemejwe n'akanama ka FIFA na komite nshingwabikorwa ya UEFA guhera mu 2014… turashimangira ko ifoto y'ikarita ya Ukraine yatangajwe uyu munsi… itakwemerwa na gato ndetse igaragara ko inyuranyije n'aho FIFA na UEFA bihagaze."
Irushanwa ry'igikombe cy'isi cyo mu mwaka wa 2026 riteganyijwe gutangira ku itariki ya 11 Kamena (6) uwo mwaka, mu murwa mukuru Mexico wa Mexique, rirangire ku itariki ya 19 Nyakanga (7) uwo mwaka i New Jersey muri Amerika.
Iryo rushanwa ryaguwe ry'amakipe 48, ni bwo bwa mbere rizaba rimaze iminsi myinshi cyane, 39.
Ukraine yashyizwe mu itsinda D hamwe na Iceland, Azerbaijan n'ikipe itaramenyekana izatsinda mu mukino wa kimwe cya kane cy'irushanwa ry'ibihugu (Nations League) hagati y'Ubufaransa na Croatia.
© 2024 BBC. BBC ntibazwa ibivuye ku zindi mbuga. Soma ibijanye n'aho duhagaze ku mihora ijana ahandi
